काठमाडौँ / नेपाल राष्ट्र बैङ्कले आइतबार १३ अर्ब १० करोड रुपैयाँ बराबरको विकास ऋणपत्र बोलकबोल प्रक्रियाद्वारा निष्काशन गर्ने भएको छ । असोज १५ गते जारी गर्ने गरी बैङ्कले ८ वर्षे ‘विकास ऋणपत्र २०८८ ‘ग’ को बोलकबोल गर्ने भएको हो ।
आइतबार दिउँसो ३ बजे बोलकबोल हुने उक्त ऋणपत्रमा इच्छुक खरिदकर्ता बैङ्क तथा वित्तीय संस्था, गैर-बैङ्क वित्तीय संस्था, बीमा कम्पनी, सङ्गठित संस्था तथा नेपाली नागरिकले आइतबार दिउँसो ३ बजेभित्र आवेदन दिन सक्नेछन् ।
२०८० असोज १५ गते बिक्री हुने ऋणपत्र आगामी २०८८ असोज १५ गते परिपक्क हुनेछ । ऋणपत्रको ब्याज भने प्रत्येक ६/६ महिनामा भूक्तानी गरिने बैङ्कले जनाएको छ । कूल निष्काशित रकममध्ये ८५ प्रतिशत अर्थात् ११ अर्ब १३ करोड ५० लाख रुपैयाँ प्रतिस्पर्धात्मक प्रणालीबाट र बाँकी १५ प्रतिशत अर्थात् १ अर्ब ९६ करोड ५० लाख रुपैयाँ विनाप्रतिस्पर्धा बिक्री गरिने बैङ्कले जनाएको छ ।
खरिदकर्ताले घटीमा ५० हजार रुपैयाँदेखि बढीमा कुल निष्काशित रकमको सीमामा नबढाई ५० हजारले भाग गर्दा निःशेष भाग जाने अंकसम्मका लागि आवेदन दिन सक्नेछन् ।
